Logo va aydentika konsepsiyalari.

­2022-yilning 16-dekabrida Toshkent shahrining yangi ma'muriy va iqtisodiy tumani — "Yangi Toshkent" shaharchasi uchun logo va gaydlayn yaratish boʼyicha yopiq tenderga taklif oldik.
Loyiha buyurtmachilari — Oʼzbekiston Respublikasi qurilish vazirligi, tashkilotchilari esa Oʼzbekiston marketing uyushmasi.

Loyihaning asosiy maqsadi "Yangi Toshkent" uchun brend yaratish qilib belgilab olindi.

Hududiy brending bizning agentligimiz uchun oʼta qiziq boʼlganligi sababli biz bu loyihada katta ishtiyoq bilan qatnashdik.

Bu taqdimotda loyiha mualliflari yangi shahar uchta asosiy oʼqlar, 5 ta koridor va 6 ta mavzuni oʼz ichiga qamrab olganligini haqida ma'lumot berildi.

Shundan soʼng jamoamiz ichida loyihaning barcha variantlari uchun umumiy qoʼshimcha mezonlarni belgilab oldik:

Hayot — bu cheksiz rivojlanish va harakat. Shahar ma'lum bir siymo sifatida hayotga kelishi uchun
u nafaqat yangicha muloqot qilish, balki yangi usulda oʼzini taqdim qilmogʼi zarur.

Bu nafaqat shahar oʼzini bildirish, balki shaharga va undagi odamga boʼlgan munosabatni haqiqatan ham oʼzgartirish uchun lozim.

Yangi Toshkent yangi avlod uchun yaratilayotgan shahar.

Shu bois bu yoʼnalishda "Yangi Toshkent" oʼzining
boʼlajak aholisi imkoniyatlarini kengaytirish vazifasini oʼz oldiga qoʼygan, ularga tayanch
boʼlishga qodir, yurakka ega shahar sifatida ta'rifladik.

Oʼzida turli vazifalarni birlashtirib, u bir joyda toʼxtab qolmaydi, uning rivojlanish strategiyasi va boʼlajak aholisining ahilligida nafaqat Oʼzbekiston, balki butun Markaziy Osiyo yuragi boʼlishi uchun harakat qiluvchi makon.

Yangi Toshkent maqsadlari va brend konsepsiyasi gʼoyalariga tayangan xolda, belgi oʼzida Y va T harflarini, mustahkam koʼhna Toshkent ustunida barpo etilayotgan Yangi Toshkentni yurak shaklida aks ettirgan.

Belgi grafikasi milliy girih naqshlariga oʼxshash
boʼlib, maketlarda yangi shahar mavzularini yagona uslubda ammo turli hil koʼrinishda tasvirlay oladi.

Logoning tuzilishi soddaligi evaziga uni shahar dizayn-kodiga integratsiya qilinishi oson kechadi. Shuningdek logoning vizual uslubi girih naqshi va tarixiy obidalarning me'morchiligiga oʼxshash. Uning bu jihati oʼz oʼrnida shahar milliy an'analarni oʼzgacha usulda rivojlantirishidan dalolatdir.

Belgining yana bir xususiyati — kalitga
oʼxshashligidir. Bu istiora Yangi Toshkentni koʼhna 12 darvozali Toshkentni ochib beruvchi makon, uning tashrif kartasi sifatida ifodalaydi.

Ushbu tushunchada oʼziga xos ma'no mavjud.
Avvalambor, bu yangi shaharning paydo boʼlishi, ikkala Toshkentning maydoni va aglomeratsiyasining koʼpayishi demakdir.
Ikkinchidan, yangi shahar aholisining farovon hayoti uchun yaratib beriladigan imkoniyatlar.

Uchinchidan, ekologiya, urbanistika va mahalla hayotini yangi shaharda uygʼunlashtirish ma'nosi.
Shuningdek, davlatimiz «Uchinchi Renessans» — yangilanish, rivojlanish va oʼsish davrini boshdan kechirmoqda. Bu barcha omillar ushbu konsepsiyada aks etgan.

Logoda — Yangi Toshkent nomidagi Y va T harflarini oʼzida mujassam etgan holda, yangi hayot, boshlanish ramzi, kelajak timsoli — yaproq tasvirlagan.
Yaproq har doim ildizga ega va bu ildiz koʼhna Toshkentdir. Belgi uch qismdan iborat boʼlib, ular Yangi Toshkentdagi asosiy yoʼnalishlarini, uchta
oʼqni ifodalaydi.

Konsepsiya yashil ranglarda ishlangan. Yashil rang yosharish, yangilanish, rivojlanish va oʼsish rangi hisoblanadi. Firmaviy uslubdagi chiziqlar barcha ashyolarga oʼsimlik poyasi kabi integratsiya qilinib, oʼziga xos timsollarni tasvirlaydi.

Aydentikada me'morchilikda aktual bionik uslubiga uygʼun boʼlgan yoʼnalish ishlatilgan. Shaharning dizayn-kodida bevosita brend mohiyatini anglatib bera oladi.

Toshkentni kelajakda rivojlangan megapolis sifatida koʼrish orzusi Yangi Toshkentda oʼz shakliga ega
boʼlmoqda. Yangi Toshkent dinamik, zamonaviy, mehmondoʼst va avvalambor, inson uchun yaratilayotgan shahar.

Bu yerda progress va dunyo shaharsozlik standartlariga integratsiyalashuv jarayonlari an'anaviy madaniyat bilan chambarchas
bogʼlangan.

Ushbu konsepsiya milliy madaniyatni innovatsion, hozirgi zamon «nafasi» orqali oʼzligini saqlab qolgan holda qaytadan kashf qilishga qaratilgan.

Logoning abstrakt shaklida Humo, yangilanish timsoli bodom guli va Y harfi mujassam etilgan.

Firmaviy uslub dinamik boʼlib, Yangi Toshkentning jadal qurilish jarayonini keyin esa undagi ildam shahar hayotini «harakat» tushunchasi orqali ifodalagan.

Yorugʼlik bu quvvat va harakatdir. Toshkent kelajagi uchun yangi tong otmoqda. Davlatimiz «Uchinchi Renessans» davrini boshdan kechirmoqda va renessans soʼzining oʼzi ham «qaytadan uygʼonish» ma'nosini anglatadi.

Konsepsiyaning asosiy gʼoyasi Yangi Toshkentni butun Respublika miqyosida yangi quvvat, yangicha gʼoyalar, yangicha shahar sifatida chiqayotgan quyosh timsoli orqali ifodalashdir. Ushbu istiora yangi shahar imkoniyatlari va boshlanayotgan ulkan oʼzgarishlarni anglatadi.

Oddiy va sermazmun belgida ufqdan chiqayotgan quyosh, daraxt koʼchati, shaharning uchta oʼqiga referens boʼlgan Ulugʼbek rasadxonasidagi sekstant, Y va T harflari, 5-ta tashabbus, 5-ta koridor va milliy naqshlar kabi mavzular mujassam etilgan. Oʼziga xos belgi firmaviy uslubda minimalistik tarzda maketlarga joylashib har bir mavzuga mos rangda tasvirlangan.

Yangi Toshkent ulkan istiqbol shahri. U Toshkent hayoti va imkoniyatlarini o'zgartirish boʼyicha katta rejaning boshlangʼich nuqtasidir.

Bu yerda texnologiya, ta'lim, turizm, ekologiya va davlat me'rosi kabi 5 ta istiqbolli yoʼnalishlar yangicha rivojlanadi. Xuddi quyosh tizimiga
oʼxshab Yangi Toshkent yulduz sifatida oʼz tizimida koʼpgina faoliyat sohalarini qamrab oladi.

Ushbu konsepsiyada 5 ta istiqbolli yoʼnalish, 5 ta tashabbus va 5 ta tematik koridor majoziy ma'noda yulduzga aylanib 5 ta nurga ega. Har bir nur ma'lum bir yoʼnalishni ifodalaydi. Shuningdek, belgi perspektivadagi yoʼlga ham oʼxshash boʼlib, va bu ma'noda u Yangi Toshkent koʼzlayotgan katta maqsadlarni va bosib oʼtadigan yoʼli ham tasvirlangan. Monumental va yorqin belgida «Y» va «T» harflar monogrammasini ham koʼrish mumkin.